შემაჯამებელი ღონისძიება

„ადგილობრივი თვითმმართველობის განხორციელების პროცესში მოქალაქეთა მზარდი მონაწილეობის ინიციატივა“ , ასე ჰქვია პროექტს, რომლის შემაჯამებელი ღონისძიება გაიმართა დღეს გურიის ახალგაზრდული რესურსცენტრის ორგანიზებით ოზურგეთის დემოკრატიული ჩართულობის ცენტრში. 
ღონისძიებაზე გურიის ახალგაზრდული რესურსცენტრის წარმომადგენლებმა თამარ ღლონტმა და ოთარ რევიშვილმა ისაუბრეს პროექტის მიღწევებზე და მის მნიშვნელოვან შედეგზე - მოქალაქეთა ჩართულობის ინოვაციურ მექანიზმზე/პლატფორმაზე, რომელიც მომზადდა ოზურგეთის მუნიციპალიტეტის თვითმმართველობასთან აქტიური თანამშრომლობით. სწორედ აღნიშნული მექანიზმის გამოყენებით დაინერგა ქალაქ ოზურგეთში თანამმართველობითი ბიუჯეტი. აღნიშნულისთვის ადგილობრივი ბიუჯეტიდან 150 ათასი ლარი გამოიყო. 

პროექტი - „ადგილობრივი თვითმმართველობის განხორციელების პროცესში მოქალაქეთა მზარდი მონაწილეობის ინიციატივა“-განხორციელდა გურიის ახალგაზრდული რესურსცენტრის მიერ. პროექტი დაფინანსებულია ამერიკის ეროვნულ დემოკრატიული ინსტიტუტის (NDI) მიერ და მისი მიზანია მოქალაქეთა ჩართულობის გაზრდა ადგილობრივი თვითმმართველობის განხორციელების პროცესში.